白话广州 ◎江晖 自由职业者
据报道，为方便广大市民前往萝岗香雪公园游览，三汽公司即将开通一条天平架到萝岗香雪公园嘅临时专线。
每逢挨年近晚，冬至前后，就系梅花盛开嘅时候。梅花系文人骚客最钟情嘅花卉之一，因为佢耐寒、傲雪，有风骨。就喺广州嘅萝岗区，就有一个历史悠久嘅著名赏梅好地方——曾经被评为羊城八景之一嘅萝岗香雪（公园）。喺公园里面，当梅花盛开嘅时候，红色、白色嘅梅花各自招展，各具风姿，花团锦簇，令人赏心悦目。其实萝岗种梅始于宋代，但因为种种原因，呢度曾一度荒废，都系近年先大面积种植梅花，重现昔日风采。
萝岗香雪公园嘅最高峰叫萝峰，上面山石突兀，草木繁茂。早喺南宋时期，呢度就有间萝峰寺，一个叫钟玉岩嘅书生喺呢度住过并考取到功名，告老还乡后就返精舍辟地教书。南宋定庆元年，钟玉岩过身，三太子将呢度改建，并赐名“玉岩书院”。喺历史嘅河流里，萝峰寺同玉岩书院有住千丝万缕嘅关系，到今日，两者基本都已经二合为一。从南宋到清朝，数唔尽嘅达官名流、文人骚客慕名而来，重留低好多石刻和墨宝添。书院先三蚊鸡门票，抵去嘞。
我连续好几年都有去萝岗探梅，见证住市区去萝岗公交嘅发展，初头一两次，要转几趟车，花个几两个钟先去到架。近年，政府重视推广萝岗景区，去嗰边嘅交通真系一年比一年方便。噉样各位街坊放假又有一个好去处嘞。
